PREMIOS DIRECTOS. ARTISTA DO ANO E PERSOA DO ANO

Os II Premios da Industria Musical de Galicia, rebautizados como Premios PALCO, impulsados por AGEM e a Xunta de Galicia, co apoio da Deputación da Coruña, anunciaron o pasado 27 de outubro os proxectos seleccionados pola Xunta Directiva da Asociación Galega das Empresas Musicais como Artista do Ano e Persoa do Ano 2026 nesta segunda edición dos galardóns.

AGEM decidiu outorgar a The Rapants o Premio ao Artista do Ano 2026, mentres que, na categoría de Persoa do Ano 2026, foi elixida a Fundación Paideia. 

THE RAPANTS. ARTISTA DO ANO

Desde a Asociación Galega das Empresas Musicais recoñecemos a The Rapants co galardón ao Artista do Ano nesta segunda edición dos Premios PALCO, os Premios da Industria Musical de Galicia, porque representan unha das realidades máis estimulantes da música galega actual. 
Coa creación de The Rapants Club, a banda de Muros foi quen de construír algo que vai moito máis alá dun disco ou dun concerto: unha comunidade na que o público se recoñece, coa que se identifica e da que quere formar parte. Encher o Multiusos Fontes do Sar cun proxecto propio, desde Galicia e cunha proposta dirixida especialmente a unha xeración nova, é un fito que merece ser celebrado e recoñecido. Demostra a capacidade do talento galego para mobilizar milleiros de persoas, crear referentes propios e conquistar espazos tradicionalmente asociados a grandes artistas estatais e internacionais. 
The Rapants son hoxe embaixadores dunha escena musical galega viva, contemporánea e con moito que dicir, ademais dun exemplo de como a conexión co público pode converterse nunha das grandes fortalezas dun proxecto artístico. 

FUNDACIÓN PAIDEIA. PERSOA DO ANO

Desde a Xunta Directiva de AGEM, organizadora de PALCO xunto á Xunta de Galicia, decidimos outorgar o recoñecemento á Persoa do Ano 2026 á Fundación Paideia. Este recoñecemento responde ao seu compromiso sostido coa industria musical galega e a una labor de acompañamento, formación e profesionalización cuxo valor é difícil de cuantificar. Desde unha posición sen ánimo de lucro, Paideia leva anos ofrecendo ferramentas, oportunidades e apoio a artistas e proxectos emerxentes, contribuíndo a que o talento poida desenvolverse e atopar o seu lugar no sector. 

A achega da Fundación Paideia vai moito máis alá da formación: representa unha guía constante para quen comeza, unha oportunidade para adquirir capacidades profesionais e un impulso decisivo para que novas propostas musicais poidan medrar, gañar visibilidade e construír unha traxectoria. Recoñecer á Fundación Paideia é recoñecer tamén a importancia de traballar colectivamente polo futuro da música galega, investindo nas persoas, no talento e nas condicións que fan posible unha industria máis sólida, preparada e sostible.

Ademais destes tres galardóns xa anunciados, un xurado profesional composto polas asociacións AGEM, AGATEC, TESGAL, AGPXC e CLUBTURA, xunto ás e aos gañadoras e gañadores da pasada edición dos premios, seleccionaron un total de 42 proxectos finalistas nos Premios PALCO 2026, 3 por cada unha das 14 categorías xerais contempladas nos premios. A noite do martes, 3 de novembro, daranse a coñecer os proxectos gañadores nun encontro sectorial na Sala Capitol de Compostela, onde tamén terá lugar a entrega dos galardóns.