PALCO, o primeiro punto de encontro da industria musical que se celebrará en Galicia, organizado por AGEM e a Xunta de Galicia, a través da Axencia Galega das Industrias Culturais (Agadic) e os Concertos do Xacobeo, co apoio da Deputación da Coruña, acollerá a velada do martes, 3 de novembro, a celebración da segunda edición dos Premios da Industria Musical de Galicia, rebautizados como Premios PALCO, que xa teñen finalistas para este 2026.
As candidaturas foron elixidas por un xurado profesional composto polas asociacións AGEM, AGATEC, TESGAL, AGPXC e CLUBTURA, xunto ás e aos gañadoras e gañadores da pasada edición dos premios. Deste xeito, foron seleccionados un total de 42 proxectos finalistas, 3 por cada unha das 14 categorías xerais contempladas nos premios.