QUE É PALCO?

MISIÓN

Galicia e a súa industria musical

A música galega leva anos demostrando a súa capacidade para emocionar, innovar e chegar cada vez máis lonxe. Vive un dos momentos máis fértiles da súa historia grazas ao talento dos seus artistas e ao traballo dunha comunidade profesional que impulsa, acompaña e fai posible que a música suceda.

Galicia conta cun ecosistema musical vivo, creativo e profesional. Un territorio cunha identidade propia, cunha rede de salas esencial para a súa actividade cultural, con festivais de referencia e con proxectos capaces de dialogar co local e co global.

E PALCO nace para reunir esa realidade.

Faino como punto de encontro para darlle visibilidade ao talento, fortalecer vínculos e xerar novas oportunidades. Un espazo para compartir coñecemento, activar relacións profesionais, presentar proxectos e impulsar novas vías de colaboración.

Porque a música medra cando circula. Cando conecta persoas, ideas e proxectos e cando atopa contextos que favorecen o intercambio, a creación de alianzas e a apertura de novos horizontes.

Durante tres días, Santiago de Compostela converterase no escenario onde a industria musical —principalmente a galega— conversa e se proxecta, cos obxectivos de descubrir, aprender, compartir experiencias e construír futuro.

PALCO será o escenario da música galega, no que os e as profesionais do sector serán protagonistas.

Benvidas e benvidos a PALCO, onde Galicia conecta a industria musical.

Por algún motivo no se a completado la carga de la galeria, pincha el botón recargar para intentarlo de nuevo.

Recargar

OBXECTIVOS
Cinco razóns para formar parte de PALCO

Visibilidade

Visibilidade

Dar foco ao talento, aos proxectos e ao ecosistema musical galego

Conexión

Conexión

Favorecer relacións entre artistas, empresas, programación e institucións

Oportunidades

Oportunidades

Xerar contextos útiles para a colaboración e o desenvolvemento do sector

Circulación

Circulación

Impulsar a presenza da música galega en novos espazos e redes

Proxección

Proxección

Reforzar Galicia como territorio de creación e industria musical

EQUIPO ORGANIZADOR

PALCO é un proxecto codeseñado no marco do Plan Estratéxico da Industria Musical de Galicia, organizado por AGEM e a Xunta de Galicia, a través da Axencia Galega das Industrias Culturais (Agadic). Nace da vontade compartida de reforzar a conexión, a vertebración e a proxección do sector. A súa creación responde a unha das principais conclusións extraídas durante o proceso de elaboración do Plan: a necesidade de contar con espazos compartidos, útiles e sostibles, pensados desde dentro da propia industria e ao servizo das súas necesidades reais.

Así, a súa estrutura e os seus contidos despréndense da colaboración entre entidades, profesionais e axentes do ecosistema musical galego, que participan de forma activa na definición e no desenvolvemento da iniciativa. A través desta metodoloxía de traballo compartido, PALCO materializa unha visión colectiva do sector e aspira a consolidarse como un espazo de encontro, intercambio e impulso capaz de fortalecer os vínculos profesionais, xerar novas oportunidades e contribuír ao desenvolvemento dunha industria musical galega máis conectada e articulada e con maior capacidade de proxección.

 

Xunta de galicia Galicia Calidade Xacobeo 2027 Asociación Galega de Empresas Musicais Ministerio de Cultura Mondo Sonoro Edición Noroeste

SOBRE AGEM

A Asociación Galega de Empresas Musicais (AGEM) nace en 2007 para defender os intereses profesionais das empresas galegas vinculadas á música en vivo: produtoras, promotoras, representantes, axentes de contratación, compañías de representación artística, editoras fonográficas e empresas técnicas, entre outras actividades relacionadas coa xestión cultural e cos espectáculos.

AGEM está integrada por empresas que conforman a cadea de valor da actividade cultural e musical. Empresas que realizan actividades de deseño, xestión e produción de eventos de carácter cultural, musical, educativo, social e de entretemento, destinados a ser realizados en locais pechados ou ao aire libre e, en xeral, todas as actividades técnicas e preparatorias para a execución destes eventos ou servizos, incluídos a actividade comercial, a representación de artistas, festivais, distribución e xestión.

Estas entidades traballan en distintos mercados de artistas internacionais, que conforman as programacións de numerosos festivais e espectáculos producidos en Galicia e noutros territorios. Igualmente, hai empresas que representan diversos artistas, na súa maioría galegos, que traballan en mercados de todo o mundo.

As socias da AGEM son promotoras de festivais maioritariamente producidos en Galicia, pero tamén noutros territorios. Empresas de produción técnica e persoal técnico especializado que traballan en numerosos espectáculos producidos dentro e fóra de Galicia. Distintas gravacións producidas ou editadas por integrantes de AGEM teñen repercusión en mercados internacionais e son sincronizadas tanto no ámbito fonográfico como no editorial en producións audiovisuais: longametraxes, curtametraxes, documentais e publicidade.

O impulso industrial propiciado pola AGEM vai máis alá do facturado polas empresas asociadas. O impacto económico dos espectáculos nos que participa AGEM, tanto de artistas en solitario coma de festivais, é de mais de 100 millóns de euros. As empresas que conforman AGEM son a raíz do sector cultural e resultan fundamentais na industria global da cultura, na música e no seu tecido económico.

  

SOBRE Agadic

A Axencia Galega das Industrias Culturais (Agadic) é a entidade instrumental da Xunta de Galicia que ten por obxecto o impulso e a consolidación do tecido empresarial no sector cultural galego mediante a cooperación na achega de factores produtivos, no fomento da oferta de bens e servizos e na asignación de ingresos suficientes e estables.

Creada en 2008, o seu ámbito de actuación engloba a totalidade das actividades culturais e artísticas desenvolvidas por creadores individuais, empresas e industrias culturais, co obxectivo de acadar a súa máxima difusión.

Dependen tamén da Agadic o Centro Dramático Galego, como unidade de produción e promoción teatral que inclúe a xestión do Salón Teatro de Santiago de Compostela; o Centro Coreográfico Galego, dedicado á produción e difusión da danza; e a Filmoteca de Galicia, dedicada á difusión, conservación e arquivo audiovisual.